Historia

Zentroaren historiaren jatorria ur sufretsuko bainuetxe ospetsu batean dago, eta beraren izena Historian ezagun egin zen bertan hil zutelako Antonio Canovas del Castillo 1897ko abuztuaren 8an, Espainiako Ministroen Kontseiluko buru zela.

Osasun-etxe psikiatriko gisa, ordea, hilabete batzuk geroago hasi zuen bidea. 1898ko urtarrilaren 26an Gasteizeko Elizbarrutiaren eliza-baimenak jaso zituzten, eta urte bereko martxoaren lehenean sinatu zuten bainuetxeko eraikin eta lursailen salmenta-eskritura. Alde batetik, Benito Menni Aita, “El Iris” eta “La Rosa” sozietate anonimoen gerentea, hurrenez hurren San Joan Jainkoarenaren ospitale-ordenaren eta Jesusen Bihotzaren ahizpa ospitalekoen ordezkari zirenak.

Osasun-etxea apur bat geroago inauguratu zuten, 1898ko ekainaren 1ean. Benito Menni Aita Santa Agedan zegoen, eta inaugurazio-ekitaldia xumea izan zen: Gipuzkoako eta Arabako Foru Aldundiek ordura arte Valladoliden zituzten lehenengo gaixo taldearen (emakumeak eta gizonak) harrera.

Urte batzuk geroago, 1904ko uztailaren 12an, San Joan Jainkoarenaren Ospitale-ordenaren eta Jesusen Bihotzaren ahizpa ospitalekoen artean adostuta, ondasunen banaketa egin zuten eta egoitzak eta lursailak banatu zituzten. Ordutik aurrera, bi zentro bereiz izan ziren.

Sortu zenetik gaur egunera arte, buru-osasunaren alorrean eskumena duten hainbat erakunde publikorekin sinaturiko hitzarmenen arabera ematen du zerbitzua San Juan de Dios Ospitaleak. Hori dela eta, jatorrian Gipuzkoa, Bizkaia, Madril eta Burgosko aldundiekin izan zituen hitzarmenak.

Gaur egun, ospitaleak iraupen luzeko ospitaleratzeak eskaintzen dizkie Gipuzkoako eta Bizkaiko gaixo psikiatrikoei, Eusko Jaurlaritzaren Osasun Sailarekin sinatuta duen Osasun Zerbitzuen Zuzkidurarako hitzarmenaren arabera. Era berean, zerbitzu pribatu osagarria eskaintzen die psikogeriatriako pazienteei eta psikiatriako kanpoko kontsultak ere eskaintzen ditu.